勇字當頭話之你「沙士」
球驗客手記：碧咸下月照訪亞洲

「沙士」肆虐令好多球隊同人取消東來亞洲行程，曼聯嘅萬人迷碧咸就一於少理，堅持響下個月尾（日子未落實）嚟亞洲出席巡迴推廣活動，真係勇字當頭。最可惜香港唔係佢行程之一，香港球迷同佢緣慳一面嘞。
據報講，碧咸將會到日本、馬來西亞、泰國同埋越南進行為期五日訪問。碧咸就話舊年到日韓踢世界盃令佢留下唔少開心回憶，球迷對佢又好，所以決心再訪亞洲，都咪話唔重感情。當然啦，相信贊助佢響呢個非常時期東來嘅公司，絕對唔會虧待佢；間公司就唔肯透露碧咸宣傳費，但唔使講都估到係天文數字啦。

維埃里發憤做教練
自從舊年俾屈福特炒魷後，光頭佬維埃里基本上都無所事事。近日佢終於話會的起心肝計劃喺祖家意大利讀番個教練課程，一於攞完張沙紙教吓波喎。唔止咁，佢重話唔介意由低教起，就算乙丙組球會都照殺。又係嘅，睇見前隊友文仙尼響拉素教波有聲有色，光頭佬梗係想有樣學樣啦。

國足「遲到」對日本濕滯
由於參加東亞盃三隊毋須提前到日本，國足決定喺二十六號先至會飛去橫濱。之不過，邵佳一等三「德國兵」就唔會返中國，直接去東瀛會合，即係只得日幾時間齊人練波。睇番中國隊首場比賽喺二十八號踢，對手重要係東道主日本，咁短時間齊人備戰，默契肯定唔及對手，點解唔提早幾日到埗呢？

網隊攤唞多有計
由傑特領軍嘅NBA網隊，噚日係季後賽次圈以四比○將塞爾特人掃出局，喺東岸決賽對手將會係76人或者活塞嘅勝方；但無論對手係邊個，網隊都佔盡優勢，因為佢至少比對手多五日時間攤唞，如果76人同活塞要打到第七場定生死，咁就多休息七日㖭，網隊嘅捧場客肯定笑呵呵啦！

雲根迪有料唔「憂嫁」
早兩日NBA黃蜂搵前紐約人教練雲根迪面試，雲根迪即時婉拒；點知噚日又傳騎士隊列雲根迪為新教練候選人首選，認為佢好適合執教年輕嘅騎士；證明有料嘅人緊係唔憂做㗎。以雲根迪六次帶領紐約人入季後賽嘅威水史，我求驗客相信只要金錢加誠意，佢都好快辭退評波人嘅工作囉！