大編輯送我一本《戰國策》，五月號封面故事係SARS重創香港，特約記者林美茵訪問世界衞生組織傳染病科行政總監希曼醫生（Dr.DavidHeymann），爆咗一啲內幕。
林美茵本來係報紙記者，後來去咗日內瓦讀博士學位，研究WTO，順便做埋《戰國策》嘅日內瓦特派記者，以前訪問過中國駐聯合國大使。
呢次訪問希曼醫生，揭露咗早於三月三十一日世衞組織就建議全球旅客避開香港，其後應港府要求，延遲至四月二日先至公佈。希曼對記者話：「記得有一天我們要取消記者會嗎？那是因為香港要求我們多給一點時間，而我們同意了。」
《戰國策》五月號出版後，陳馮富珍否認政府早知有疫區預警，並且立即打電話去日內瓦搵希曼醫生傾偈。希曼後來打電話畀記者澄清，因為瑞士與香港有七小時時差，佢唔多記得係三月三十一日還是四月一日通知香港，當佢記錯咗啦！
既然如此，WHO可謂十分畀面陳馮富珍！但左丁山諗起，四月一日愚人節，一位中三學生偷用「明報網站」標誌，發放「香港成為疫埠」嘅假消息，搞到香港亂晒籠。呢位學生唔知係唔係有「天耳通」，聽到日內瓦與香港嘅對話？無論係三月三十一日還是四月一日，呢位學生嘅預測中晒，問你服未？希曼醫生嘅訪問共六頁，十分好睇，另外一篇訪問威院梁家騮醫生痛談威院感受，亦不可錯過。