星期日嘅維園除咗賓妹多之外，由今個禮拜開始重會多咗一班喺度擺地攤賣嘢嘅後生仔女，因為香港中華基督教青年會將會舉辦一個名為「Farm」嘅活動，當中有號稱全港最強嘅跳蚤市場，私人珍藏、外國貨、二手貨、自製手作仔合共120個地攤，樣樣都有得賣；有無原宿代代木公園咁潮咁旺就要等到星期日先知，不過𠵱家就可以先嚟個正貨預覽，睇下有咩攤檔，鎖定目標啦。
記者：馬慶武 攝影：梁細權
除咗跳蚤市場外，喺未來幾個月Farm同場重會舉行潮流講座、滑板比賽等活動，而喺開幕當日於跳蚤市場旁邊嘅足球場就會舉行青年音樂會，到時會有年輕人偶像Shine、陳冠希等表演，Fans必到！
「連Farm都話要學日本代代木公園，證明日本貨始終較啱年輕人口味，今次擺檔如果反應好，都會諗下開舖頭㗎。」做GraphicDesign嘅Dominic（23歲），透過相熟嘅日本朋友幫手，特別入咗一啲日本貨品準備喺Farm度賣，雖然唔係咩名牌貨，但係款式唔差之餘，價錢重好平。重有自己設計嘅圖案Tee，識得跟Tee送襟章，真係跟足潮流噃。
「諗住喺一日內賺三萬蚊！」雖然有啲大想頭，但係勝在夠決心。巴士迷Sam（23歲）大學畢業後做IT設計Network，一個月只得三千幾蚊人工，做咗三個月頂唔順辭職，所以今次就拎自己儲咗十幾年嘅巴士收藏品出嚟博一博，希望賺到錢再加埋自己啲積蓄開巴士迷專門店咁話。
「好老套，但係真係為咗達成夢想先參加今次活動。」原來Cathy（22歲，左）同Crystal（18歲）呢對IVE同學仔嘅夢想都係希望有人欣賞自己嘅作品，所以就決定6月15開檔，現在要通頂穿珠仔希望心願達成。
「去泰國旅行見到啲貨又平又靚，諗住入啲貨返嚟香港租番個舖位賣啦，點知整單SARS大大鑊，咁就趁今次小試牛刀，睇下香港個市場接唔接受，計下條數先。」曾做過健身教練嘅William（25歲）話之前公司裁員中咗招，所以諗住搞下生意仔，點知入咗啲泰國貨又開唔成舖，今次一於要過下老闆癮先喎。
「希望家居融合大自然呢個信念得到認同。」做冷氣工程嘅Eric（25歲）同埋教琴嘅Cherre（23歲）最愛大自然，所以佢哋嘅作品：時鐘、竹簾、麻布掛簾都盡量唔用塑膠、金屬等人工材料，全力支持環保家居。
Farm資料室
日期：5月18日至11月（逢星期日）
時間：11:00am－6:00pm
地點：銅鑼灣維園噴水池附近
註：𠵱家想參加都未遲，不過因為反應超踴躍，首次申請已經有接近二千人報名，而每星期Farm只可容納120個攤位，所以𠵱家申請可能要到一兩個月後先有位。（查詢電話：25573748）