美股周一晚走勢強勁，杜指及納指均升1.4%，前者收8726，後者收1541。納指再升破去年12月頂部1521，只要守穩其上，升勢未完，甚至有望牛市重臨，納指今個月若守在1540之上收市，後市可看高一線，否則短期會出現整固，在1360至1540上落。杜指走勢落後納指，若升破9000關，亦有望牛市再現，但短期在8300至9000之間上落機會較大。
如果美股前晚不是大升，相信港股昨日會出現較大調整。恒指輕微高開後，大部份時間在9110至9150窄幅上落，最後收9119，跌36點。
倉內的恒指Put輪9698升2.8%，收0.145元，表現已算不錯，溢價由前日3.8%縮至3.5%，亦算合理。其他恒指Put輪如9775雖然年期稍長，但早前溢價由7%擴至10%，昨日只收縮0.8%，已變成逆市下跌，令有貨者一肚氣，但亦難說不合理。炒股難，炒輪更難，但現時藍籌未到中長線吸納時機，股仔炒賣又不成氣候，惟有局住小注玩輪過日。
美股短期出現回吐機會大，滙豐（005）整固，唔見85元都起碼試87元，加埋中移動（941）亦有見頂迹象，回試15.80至16.20元係基本動作，港股昨日靠長實（001）及和黃（013）力撐，但除息後唔排除有好息之徒減磅，恒指後抽至50日線（現處8851）附近好正路，作為恒指Put輪9698首個食胡位唔算大貪。
趙飛雲