未睇《10天戀愛有限期》，廣告寫得幾古怪，講靚女編輯如何搵靚仔𠝹女王做十天戀愛試驗品，以求對方對自己一見鍾情後，十日內把他甩掉，乾手淨腳。
十日撇，無難度可言。尤其在沙士風暴中心，十日隔離期是表示清白的指定動作。十日後就算無中招，初初戀上你的對方，再色膽包天，都會聞沙士驚青，想唔走頭都難，度橋撇佢都慳番。
睇睇荷李活片的美式甩身法，包括：小事化大，一有不滿便大吵大鬧，甚至哭哭啼啼。
咦，似乎唔止係情色男女的激將甩拖法，如果唔講明，還以為是形容近期香港高官局長們的表現！局長因為沙士肆虐，「發晒脾四」，哭與鬧都試過了。結果，市民的的確確很想撇佢！奈何所謂問責制，是首長與局長們的戀愛戀事，跟市民權益無關。他們的戀愛期，表面是有限公司需要問責，實情做晒內幕交易，呃晒股東。你大聲疾呼叫他們落台，對方會回應：關你戀事！
肥皂電影不談政治，撇仔𠝹女搵戲來做，十日甩拖，其實是男歡女愛都市生態。戀愛有限期，十日之內要loseaguy，很多人的實戰經驗豐富。一夜情已out，近來興玩十五二十。戀事延長，五日過短，十日相當夠皮，就算沒刻意撇開，大家都會各有各散，根本唔使落重藥。