港股在9200阻力甚大，投資者轉趨審慎，成交萎縮至68.6億元，恒指收報9119，跌36點。長實（001）及和黃（013）雖然威猛，但旗下長江生命科技（8222）更大發神威，全日升19%，收1.73元，成交高達1.5億元。長科近期由1.20元水平起步上升，偶然成交亦有千萬元，估唔到一公布會推出VitaGain免疫素產品，噚日即刻勁升。
Cookie話最近要留意長和旗下股份，據聞唔少與超人關係甚密的華資與中資，想合作搞活股市，可能撥出一筆資金炒股，在股市大展拳腳，一於要「同心抗逆（疫）」，超人系股份相信會成為追捧對象。tom.com（8001）噚日急升6.1%，收報2.175，成交達3689萬元，和記港陸（715）亦升5.4%，收報0.59元，成交有成4202萬元。
市場噚日傳出中石油（857）配股，中石油是H股，配發新股唔容易，但大戶大手配股就絕對唔出奇，因為最近都試過有ABB沽中石化（386）舊股，令中石化飽受沽壓。如果今次出貨係畢菲特，中石油就真係大件事。
自從撤銷最低經紀佣金後，證監會公布C組經紀平均每日成交佔12.12%，反映小經紀生意亦隨着大市成交活躍而上升。不過，ｉ師傅一位紀經朋友指證監會講風涼話，佢話𠵱家成交增加，唔代表佣金收入上升，因為現時唔少經紀行為求生存，以月費形式幫大行做Order，例如大行每月畀4萬元佣金，就可以向細行任落Order，如果市旺，肯定做到啲Dealer嘔血，但細行所賺取佣金只係雞碎咁多。近日港股成交大增並非由散戶帶動，證監會根本冇Check清楚。
阿虎