澳洲姊妹花KylieMinogue同DanniiMinogue雖然齊齊喺英國發展，不過佢哋兩個嘅際遇可謂差天共地，Kylie愛情事業兩得意就唔在講啦，可惜佢個妹Dannii近年出親碟都無聲無息，再唔諗計博出位就真係坐以待斃！
最近Dannii喺最新single《Don'tWannaLoseThisFeeling》嘅MV入面，又再不經意咁露兩手，呢個MV內容係講佢同男友遊車河期間，着住bra-top嘅Dannii突然跳上揸緊車嘅男友大髀上面，重表演一段辣身舞，搞到佢男友慾火焚身，睇怕呢個ＭＶ喺下月頭出街嗰陣，肯定會令到一班男fans流晒口水。
咪睇Dannii經常袒胸露臂，一副自信心爆棚咁樣，其實佢話曾經喺九五年嗰陣隆過胸，原因重唔多唔少都同Kylie有關。Dannii話嗰陣佢覺得家姐Kylie好完美，自己就好肥，所以咪走咗去做手術囉，搞到今時今日好後悔，聽落又真係幾慘嘅！