恒指回番些少，好正路。國企指數偏穩，公路股出色，滬杭甬（576）醒神，收2.925元，升7.3%，兩隻Call輪因而上榜。
9703收17.8仙，升幅45%，隻輪今年10月到期，溢價18.2%，槓桿率16.4倍。9748收21.6仙，升幅29%，11月到期，溢價27%，槓桿率13.5倍。兩隻輪咁嘅溢價，好難買得落手。
打入龍虎榜有隻長實Call輪9602，收13.1仙，升幅35%。下月初到期，溢價3.1%，槓桿率34.3倍。
長實（001）昨日除息，實際升42仙。除息藍籌通常除息冇耐後會偏軟，9602現價溢價雖然唔大，且槓桿率爆炸力惹人垂涎，都唔值得博。槓桿率高，有時要用另1個角度去睇，就係睇錯正股之時，輪價會散得好厲害。
國內汽車股有勢，駿威（203）收2.85元，升3.6%，Call輪9746收27仙，升28%。11月到期，溢價25.3%，槓桿率10.6倍。駿威個勢仍然去緊，不過隻輪溢價好難接受。如果炒輪，記得快買快賣。
恒指收9119，若然有機會調整至9000邊邊，估計可以守吓並且跟住反彈。吼住低位撈啲恒指Call輪，對象有9723、9750、9767。個市𠵱家上吓落吓，單邊睇得太好或太淡都係唔適宜，做恒指輪無論係Call或Put，都應該以短線為上。
章盛