大市重上9000點樓上，好多股仔都想伺機炒作，好似創業板股亞洲鋼鐵交易（8080）噚日大升26.67%，收0.019元。
科網股爆破多時，小初基本上諗唔到亞鋼有乜嘢炒作理由，加上成交好細，唔夠14萬元，所以完全冇理會，以為係有心人覺得股價太殘，將股價mark高而已。
不過，經紀陳就唔係咁講，佢話市場上一直有個傳聞，話亞鋼嘅阿媽萬順昌（1001）可能大手增持亞鋼，但估計唔會係搞私有化。當日萬順昌高價分拆亞鋼上市集資，現時超低價增持，點計都有着數。
小初心諗，着數只係大股東，小小炒家如小初之流又點會有着數，最多就係有心人借消息炒作，但小初就一定唔會沾手。
另外一隻長年冇消息但股價異動嘅股仔，就係偉仕控股（856），隻股噚日成交只有53萬元，但股價則大升8%，收0.13元。經紀陳話，隻股長年唔郁，市場傳聞係內部鬧不和之故，故此今次股份異動，可能係股份轉手。
慕容小初