港股噚日早段升逾百點，挑戰9200，其後傳出世衞不肯撤銷本港旅遊警告，恒指升幅收窄至71點，收報9155，成交減至83.31億元。
阿虎仍見唔少資金買滙豐（005），電訊股亦有追捧，和黃（013）勁升3%，收報47.40元，成交達7.92億元。高調拉攏積蘇過檔嘅電盈（008）更勁升4.9%，收報5.35元。聯通（762）與中移動（941）分別升3.5%及1.5%。黑客話，美資對投資股票前景轉趨樂觀，科技股仍係首選，所以有芬佬偷步入市掃重磅電訊股。
近幾日港股成交增加，首先受惠當然係港交所（388），若游資持續流入，港交所投資評級有可能被調高。雖然暫時未有大行將港交所投資評級調高，但股價噚日急升6%，收報9.75元，成交達1.5億元，要重上10元關唔難。至於上市審批權誰屬，重要等18個月才有定案，其實事件只係意氣之爭，盈利最終仍會保留在港交所手上，對港交所收入應無重大影響。
陽光文化（307）主席楊瀾宣布增持後，股價未見起色，一直偏軟，噚日重出現插水，大跌15.4%，收報3.3仙，成交375萬元。唔通陽光文化真係打破唔到主席增持，股價就會下跌的命運？
ｉ師傅話，最近有台資密密出貨，可能係陽光同東森合作冇下文有關。陽光文化旗下陽光衛視較早前與東森合作搞衞星電視業務，但條件係必須獲得國內落地權，結果係中央政府玩番轉頭，導致陽光歷史台遭中央台禁播。其後，陽光將事件擺平，歷史台得以復播，並在新聞稿末段略略提及與東森合作有問題，當時市場可能仍未察覺合作凶多吉少，但台資似乎收到料，立刻出貨。
阿虎