李超人父子深諳宣傳之道，近日為咗旗下長江生命科技隻新品種免疫素，長科已召開咗幾次記者會，逐次放啲新料，噚日更搞咗個「長江健康自強行動」。小超人李澤鉅話，假若有人買佢隻藥連續食九十日，長科會向服用者提供兩重信心保障；首先，若呢位人士在其後九個月內有傷風感冒，睇醫生費用由長科包起；若中「沙士」，更會向該人士提供二十萬元保健金。
其實好多公司都有向員工提供醫療福利，員工亦會自己買醫療保險，所以首重保障並冇吸引力。
相反，大小超齊齊做試驗品，說服力可能重掂，據小超人話，佢同超人老竇個幾月前開始試用此免疫素，超人覺得三十幾年嘅鼻敏感好咗七成，𠵱家亦好難再叫佢戴口罩喎。小超人又話，免疫素每樽消費只相當於喺中環飲杯咖啡價錢，但要見效，就「千祈千祈千祈唔好用熱滾水沖飲，否則啲酵母會死晒，咁就冇效」，口脗十足董太。小超人重話醫護人員上網登記可免費服用，網址如下。
（圖）李澤鉅教人服用時學足董太口脗。
傳真︰2623-9278
電郵︰