曾蔭權奉命統領「全城清潔策劃小組」，有人笑煲呔變咗掃街曾，當然有更多人為佢抱不平。
八方上周六揭《大公報》，發現頭版下半版登咗個半版廣告（圖）：「熱烈祝賀曾蔭權司長榮任全人類抗『SARS』特區清潔組專員」，下款係「萬寶綠」環保集團有限公司主席林萬林。
恕八方心多，八方睇嚟睇去都唔明白林兄登廣告嘅用意，噚日終於透過種種渠道聯絡到林兄，佢認為環境清潔係全球一等一大事，而煲呔統率全人類大事，梗係要賀一賀啦！
咁林兄又會唔會再登廣告賀埋梁錦松負責振興經濟呢？點知佢衝口而出話，立法會都要佢落台，𠵱家大家等緊胡錦濤指示，做乜要恭喜佢喎？佢轉頭又打畀八方，話自己都支持振興經濟，但係目前應該先救人、後救市喎。
傳真︰2623-9278
電郵︰