人氣樂隊Beyond早排喺紅館開咗五場演唱會，反應好鬼熱烈，主辦單位恒藝亞洲同東亞娛樂決定下個月二十一至二十三號一連三晚加場，不過馮仁昭聽聞上次Beyond舉行演唱會期間，由於觀眾過度興奮，唔少人踩咗上張櫈度又跳又叫，結果踩爛咗三十幾張櫈，紅館方面𠵱家正向主辦單位追討賠償。
噚日馮仁昭同恒藝亞洲負責人丘亞葵提起呢單嘢，丘亞葵承認確實有咁嘅事，但佢估計賠償數目唔會太多，大概係幾千蚊左右就搞得掂。講開Beyond下個月加場，丘亞葵話黃家強、黃貫中同葉世榮近日已經開始練歌，事關佢哋諗住畀觀眾新鮮感，所以到時會唱唔同嘅歌，以及會做過啲衫㖭！
唔單止係咁，丘亞葵話加場嘅第一場門票收益，會唔扣除開支全數捐畀非典型肺炎死者家屬，做騷之餘都不忘做埋善事。
林嘉欣噚日出席商台嘅活動，佢話已經睇咗電影《六樓后座》嘅試片，嘉欣話：「好好笑，但係我怕有啲片段出唔到，因為喺戲入面我都有講粗口，重有啲意識好大膽嘅鏡頭，如果出唔到就好可惜。」嘉欣話其實要佢講粗口都幾高難度，要同人練習先可以講到嗰種語氣。
鄧健泓噚日去咗商台，最近佢女朋友原子鏸俾人影到喺佢新屋過夜，鄧健泓覺得呢件事十分平常，佢話：「咁男女拍拖上吓人屋企有乜咁出奇，我哋出街又俾人影，不如留喺屋企，而且我覺得佢媽咪（鄭佩佩）亦都係好開通嘅人，唔會唔鍾意嘅。」
港台噚日公布「2003電視節目欣賞指數調查」頭二十位結果，獲最高欣賞指數嘅前三位，都係一啲新聞資訊性節目，依次序係《星期六檔案》、《新聞透視》同《鏗鏘集》，但第四位就係由郭晉安同宣萱主演嘅劇集《戇夫成龍》，呢套亦係唯一可以打入十大欣賞指數嘅劇集。
唐寧近日因為喺劇集《戀愛自由式》入面飾演游泳健將，經常要喺陽光下暴曬游水，噚日佢返將軍澳電視廣播城開工，見到佢一身黑黑嘅膚色，十足十救生員一樣，唐寧話：「曬黑咗睇落健康啲，但我都驚啲膚色會變咗發霉朱古力，所以都會做多啲水份護膚。」
