銀行面對現實，肯將銀主盤降價，個別減幅達兩成，令近期呢類單位成交增多。
中原地產筲箕灣分行區域經理唐詠勤話，區內麗東海景豪苑一期低層B室銀主單位，終於賣出，畀最初叫價百八萬低兩成。呢個單位六百七呎，兩個睡房平排，望住東區走廊同指示牌，景觀差兼噪音大，呢個買家三十幾年住開嘅單位，都係望住電車路，所以唔係咁介意。
另外，原於下月中截標嘅深水灣香島道46號DoubleBay12號屋，因為買家出價理想，在公開招標僅五天，噚日獲銀主中國銀行接受，以二千五萬成交。
負責代理招標嘅美聯物業山頂及南區區域經理楊永健講，洋房近三千九呎，每呎逾六千四蚊。
另一銀主豪宅渣甸山裴樂士道10號屋，放盤約半個月，即獲承接，作價一千五百五十萬元。美聯何璦麟話，洋房三千五呎，每呎逾四千四。
發展商通常搞樓盤宣傳活動，都會請啲歌星、明星助陣，令到場面氣氛熱鬧啲，多啲人注意。
不過，產量唔及大型發展商多嘅永義國際，第一個誕生嘅樓盤旺角花園廣場，今個禮拜六中午，就請嚟人氣歌手李克勤，同埋啱啱話復出嘅陳慧嫻到場剪綵，重有男藝人方中信同林保怡。
啲「星級」人馬咁有叫座力，來頭好似重勁過啲大發展商。
個盤喺正旺角鬧市，平日都車水馬龍，到時應該好墟冚。
非典型肺炎搞到唔少食肆要執笠，但係其實仍然有好多食肆趁勢開業，租金就梗係平過以前啦。好似結咗業嘅銅鑼灣夏蕙酒店（圖四），新租客就係經營酒家嘅，月租十三萬，畀舊租平咗一成三。
美聯物業高級營業經理何德明話，有啲減幅可以重大，好似筲箕灣金華街5號地舖，九百呎，由餐廳租用，月租三萬蚊，畀上手茶餐廳低三分一。
另外，好似西九龍中心7樓嘅冠豪酒家舊址，就畀另一間酒家，連裝修同生財工具一齊承租，月租三十五萬，平過之前三成。
其實食肆呢啲「一雞死一雞鳴」嘅情況，正好係香港嘅特色，特區政府插手要大業主減租，係咪值得諗諗呢？
樓市方向唔清，代理行點做就各師各法。
華置行認為，過去鬥財力、物力、資源、關係同架構嘅年代，已經過去，未來將出現一次「革命」性嘅轉型。
佢哋話，「資源互用平台」，將會係物業代理行業的主導模式。究竟係點呢，今日就會揭盅嘞。
鴻運國際就繼開設分行之後，再成立投資同拍賣部，實行多元化。
另外，中原地產就話，非典型肺炎淡化，中記將全面裝備各分行同同事，訂立新一輪發展方向同攻勢，重喺百六間分行，全線拉起振奮標語「逆市奮進，樓市生機再現」。
睇嚟，代理行又再風起雲湧嘞。
足球比賽好多時唔使打最後一場，冠軍已經可以提早誕生，估唔到賣樓都一樣。
九肚山皓朗山莊重賣剩四間屋，發展商噚日就頒咗個銷售冠軍盃畀利嘉閣。
利記董事廖偉強好得戚咁話，全數三十二間屋，有十一間由佢哋促成，最後四間，就算畀第二名做晒，賽果都唔會變。
第二名好似做到七間屋，點解就算做到最後四間，都係利記贏呢？原來以銀碼計，利記嘅銷售成績，遠遠拋離第二名囉，抵廖董佢咁得戚嘅。
樓價近年係咁跌，拖累各行各業，都唔好景，但係，原來唔係所有物業都跌價，有啲竟然可以逆市上升㖭。
聽講，有啲買家買入啲細面積嘅貨倉，然後略加裝修，用嚟做辦公室，甚至可以過埋夜，喺咁嘅經濟市道，自然變得受歡迎。
結果，呢類單位嘅價錢唔止企梗，重有得升㖭。
不過，唔知咁做有冇違例呢？否則以貨倉價錢咁平，點計都有着數。
蘭西
電郵地址：
