真係抵我求大俠咁捧英超場，前日煞科日賽事，幾乎全部球隊都冇揸流攤，派出最強陣容應戰。須知道有啲球隊實在冇乜好爭，仍然係全力以赴，呢種專業精神確值尊敬！
好似修咸頓咁，足總盃決賽當前亦無懼多添傷兵，比亞堤等主力大都正選上陣。而佢哋嘅瑞典後衞M史雲遜更頂入「千萬入球」，因為憑佢嘅入球以一比○作客擊敗曼城後，修咸頓得以第八位完成今季聯賽，比起賽前跳升三級，贏多一百五十多萬鎊獎金，折合港幣過千萬㗎！
有最進取，都有最敗家嘅，咪就係維拉囉！佢哋作客輸畀列斯一比三後，比起賽前下跌兩級排名，收少一百萬鎊。但都有啲貢獻，就喺完場前一刻畀維杜卡射入今季英超第一千個入球，令到全季英超入球總數都達到四位數字。
先恭喜布力般，連續兩年有歐洲賽參賽權。佢哋領隊桑拿士話，最衰受到傷兵困擾，否則來季可能踢歐冠盃。嘩！桑拿士你都好大口氣喎，計我求大俠話應該多謝熱刺至真，上季聯賽盃決賽輸畀你哋，今季煞科日又畀你大勝，等你過埋愛華頓，先有得踢足協盃咋！
早前因為食可卡因，而俾英足總重罰停賽九個月嘅澳洲門將保斯尼治，最近就同記者講話好憎英式足球，往後日子希望去美國體壇發展！好心啦「肥保」，係你唔潔身自愛，而且你踢過曼聯車路士等大球會，大把前途，𠵱家不如趁停賽操fit自己等復出重好啦！
呢個禮拜啲西班牙波，認真激壞捧場客，十場聯賽只有拉科作客贏馬拉加二比○，係正路賽果兼開上盤，其他都係下盤結局連唯一平手盤馬略卡主場對皇蘇，贏波嘅皇蘇都係高水，即係俾人睇低嘅。最誇張嘅係，竟然無一支主隊可以贏波，真係奇景！
愛華頓領隊莫耶斯一直對國家隊領隊艾歷臣嗰種見高拜見低踩嘅作風唔妥協！好似月尾英格蘭友賽南非，莫耶斯諗住畀朗尼唞吓，話朗尼有傷SayNo，點知艾歷臣話有傷都要去集訓喎！計我話艾歷臣不如讓一步，無謂為場友賽，撩起鬥爭吖！
愛華頓無咗下屆歐洲足協盃參賽資格可謂功虧一簣，亦打亂下季組軍部署，其中同李鐵簽長約一事當然亦有影響，就算佢轉會費唔多過二百萬鎊，都要詳細考慮。李鐵喺季尾已經無咗正選位置，我求大俠對佢簽到長約都唔多睇好，反而繼續外借機會較大；如果佢願意以呢個形式續約多一季，起碼重有機會呀！