港股昨日走勢頗正路，恒指裂口高開80點後，最多升過125點，高見9209，其後大部份時間在9170至9190區域窄幅上落，尾市有好倉計數，在期指帶動下，恒指升幅收窄至71點，收9155，成交不俗，有83.3億元。
恒指早市在9200水平爭持頗久，趙飛雲見恒指升唔穿9200，在0.14元偷步買入30萬份恒指Put輪9698，恒指尾市雖然升幅收窄，但9698只反彈1格，收0.141元，仍跌11.3%。
恒指過去10個交易日，由8331反彈至昨日高位9209，累積升幅878點，其間大部份恒指Put輪多數跌唔足，溢價自然擴大，因此恒指出現調整初期，就算買中恒指Put輪亦多數賠唔足，因為會縮溢價。現時恒指Put輪中，9698數據算靚，但仍有3.8%溢價，要預咗恒指一路跌，9698溢價亦會跟住縮，不過相比9775及9806就較抵玩，為短炒佳選。
其實恒指昨日技術走勢並無明顯轉壞，買恒指Put輪只係博恒指升咗咁多，點都會先出現後抽，以50日線（現處8851）作首個目標，若然博到恒指展開較大調整，就當係Bonus。若睇錯，恒指確認升穿9281就準備跳車。
滙豐（005）昨逆市跌0.25元，收89元。滙豐4月尾由81.50元起步，升至昨日90元高位，除昨日之外，從未出現回吐，稍作調整亦好合理，支持位85-86元。
趙飛雲