港股連升3日，恒指最高升上9209，遇到阻力，收9155，升71點，期指低水14點。大市氣氛向好，上升層面繼續擴散，不計窩輪，上升股353隻，遠比下跌股184隻為多；國企股調整完成，升勢再現。
石化同鋼鐵業前景向好，股份交投亦活，每次調整都係低吸機會。噚日H股回升，亦係呢兩類股份升得較勁，上海石化（338）收1.21元，升5仙，北京燕化（325）亦有3.5%進帳；鋼鐵股則以重鋼（1053）較有力，最高1.11元，收1.09元，升3仙。日前推介的兗煤（1171）同駿威（203）齊開車，前者高收3.0元，升2.5%；後者高收2.75元，升3.7%。兩者走勢已確認突破，兗煤短線目標3.25元，中線3.65元；駿威短線3.2元，中線3.8元。
二三線股唔少都趁好市做工夫，彩星集團（635）整固完成，搶上0.57元，大升9.6%，由於已突破50日線阻力，可按照目標候升至3月中高位0.68元時回吐。
科技股中期升浪已確認，科技行業復甦，未來一兩年，電腦需求大增，生產顯示屏會係主要受惠者。早輪推介的冠捷科技（903），話佢落後於同儕，果然呢幾日就升咗近10%，反而早一輪急升嘅唯冠國際（334）則在0.9元水平整固，到噚日先再有番勢。唯冠規模雖然唔及冠捷，但都唔算細，每年生意有幾十億元，冠捷係全球第4大生產商，唯冠緊隨其後，若論股價升勢，唯冠「晒士」較細，爆炸力會較大。
唯冠03年度（6月結）的上半年，營業額33.56億元，升48%，獲利7328萬元，大升267%，每股盈利由3.14仙急升至11.53仙。今年首3個月接單理想，預料全年營業額可上升至66億元，獲利1.5億元，每股盈利24仙，以保守預測的6倍PE計，股價已可見1.44元，預期升幅達54.8%。
集團生產的CRT和LCD顯示屏，前者因行業整合而有愈來愈多的中小型生產商退出，後者則因市場需求急劇上升，兩者定單都有增加趨勢，下一年度盈利，預期仍會有雙位數增長。過去一年，唯冠周線圖形成大型圓底，升破0.98元，初步目標1.2元，中期上升目標為2元。
郭兆誠