囡囡再好唔係親骨肉
後母荷爾想生BB老公唔制

金像影后荷爾芭莉（HalleBerry）最近喺加拿大蒙特利爾拍緊電影《Gothika》，今次佢喺戲入面扮演一個精神病醫生，一日起身發現自己被人監禁，但係就唔記得犯咗乜嘢法，所以佢會打扮到成個監躉咁！而荷爾芭莉前日喺當地為棒球賽出任開球禮嘉賓嗰陣，同樣亦着得好casual。

十足隔籬屋師奶
荷爾芭莉同佢嘅歌手丈夫EricBenet以及女兒India，好開心咁去到蒙特利爾嘅奧林匹克運動場睇波兼主持開球禮，只見平時豔光四射嘅荷爾芭莉，前日一身街坊裝打扮，淡施脂粉，成個隔籬屋師奶咁，令我羅拉突然覺得佢好似變咗另一個金像影后莎莉菲特（SallyField）嘅黑人版咁。

音樂事業放首位
提起荷爾芭莉嘅花心老公Eric，大家唔好以為佢兩公婆已經完全冇晒事，原來佢哋心入面重係有條刺，所以荷爾芭莉就話好想同老公生番個真正係屬於佢哋嘅骨肉喎。
其實荷爾芭莉都好愛錫Eric同前妻生嘅女兒India，可惜佢始終唔係自己所生，不過Eric就話𠵱家未係時候生細路，希望將音樂擺喺第一位，難免令荷爾芭莉覺得佢喺度拖延時間。