雖則話現在經濟低迷，食店都紛紛割喉減價招客，當中仍有不少「出術」之處，但世事無絕對，位於佐敦德興街的一間食館，最近推出4碟$1菜，最重要是不設最低消費，我幫襯過真係完全無取巧，淨叫4碟埋單連茶芥加一20蚊有找，好抵食！
記者：何善華
攝影：黃子偉
其實杭州菜喺香港都算少見，行高格調路線似乎是最理想的做法，但店東吳強新表示，以平價上海及杭州菜招徠顧客的做法是經過深思熟慮的，目的是以便宜的菜式吸引新一批年輕顧客，而口味更專為本地人而設，以少油少膩為主的上海菜，加上以清淡為主的杭州菜，能迎合一班「既愛吃又愛靚」的女士們。
老闆吳先生開設滬菜食館前曾經在幾間上海飯店當經理，後來發現人稱為美食之都的香港竟難見到杭州菜館，心想若果將杭州菜以較便宜的形式推出市面，應該會有發展的空間。
萬事俱備下，吳強新夥拍幾位志趣相投的好友，合資開設一間集上海及杭州小菜的食館，終於在上年年尾開始經營，半年來生意尚算不俗。雖然近來受「沙士」影響不少收入，但他明白「創業難守業更難」的道理，認為疫症總有過去的一天。吳先生認為滬菜在香港有立足之地，而且單以滬杭菜做招徠已是信心保證。
「香港人出名嘴刁，以上海菜帶出杭州菜，令食客有更多元化嘅選擇，唔會淨係食一味嘅地方菜，新鮮感已經贏晒啦！」
吳老闆表示港人對杭州菜有一種好奇又嫌貴的感覺，尤其在現今的經濟環境，經營食店必須懂得靈活變通，看準時機便要快手出擊。
「上海菜出名大油大膩，而杭州菜則以清淡為主，兩種地方菜各走極端已經係賣點，但我哋食店嘅滬菜經過改良後，口味本地化……有唔少上海食客更嚟到試新式唔油膩嘅上海菜㖭！」
吳老闆為了讓顧客品嘗菜餚時有在家吃飯的感覺，特別為食店選購類似家用式的擺設，更特意僱用入廚多年的上海師傅為總廚，研究不同菜式讓食客增添口福。
吳老闆續稱，一蚊上海小食絕對是蝕本價，目的只是要讓顧客食得開心。
「就算人客入嚟只係食四碟一蚊菜，連茶芥及加一小帳唔使二十蚊就埋單都可以，我敢肯定出面一定唔止呢個價錢同質素，但我哋都會盡力服侍同滿足顧客嘅要求，希望客人可以食得開心。」
此外，吳強新話每位顧客一入到食店，會免費送上冰凍豆漿一杯降降溫，加埋如此抵食兼高質的菜式，今日就唔使再問「去邊度食飯」啦！
全部$1
回鍋肉源於四川，但各地製法不一，師傅經過蒸熟後再炒製而成的回鍋肉，色澤紅綠相襯，肉片厚薄均勻，軟硬適中，而且微辣帶甜，與其他菜館食的有點兒分別。
炮製熏魚的過程極考功夫，必須以明火及小火慢慢燒煮，再利用鍋爐把魚肉炸至表面呈金黃色，吸收醬汁才可盛盤上桌，但我發現這道菜用作冷盤食亦很有風味，口感相當清爽。
配上芝麻醬的雞絲粉皮，酸酸哋而且好夠香，刺激胃酸及食慾，最好是先食這一道菜開開胃。
雖然小籠包是一道很普通的小吃，但要做得出色卻頗考大廚功夫，該店選用了新鮮豬肉及秘製的豬皮凍，真正皮薄多汁，小心燙口呀！
單單看食相已經給滿分，色彩斑斕的四喜餃是杭州家傳戶曉的名氣點心。餃子有蝦仁、海參粒、雞肉、冬菇配豬肉，各具特色，口感一流。
德興館（新滬杭料理）
地址：九龍德興街4-6號富麗閣地下1-2號舖
電話：23170663
營業時間：11:30am-11:30pm