電訊股昨日出色，電盈（008）與中電信（728）當先，分別上升4.9%與4.6%。電盈Call輪最威係9637，由1.4仙飛上2.1仙收市，升幅50%。幾近1仙嘅仙輪，例牌大波動，買賣者亦預咗好似賭錢，大贏大輸，今年11月到期，溢價40.3%，槓桿率51倍。行使價7.2元，正股5.35元距離行使價好遠，隻輪極有可能到最後唔值錢，電盈Call輪其實好難搵對象，最實際嘅係9791，明年3月到期，現價1.35元，溢價9.3%，槓桿率4倍。
中電信Call輪9696由16仙升上20.3仙，升幅27%，11月到期，溢價4.6%，槓桿率7.8倍，數據合理，不過正股𠵱家累積升幅唔細，有超買迹象，隻輪暫時買唔過。
聯通（762）升3.5%，但冇任何聯通Call輪有着數，皆因隻隻溢價都超高，正股升都冇法子帶挈佢哋。中移動（941）升1.5%，中移動Call輪9551由1.4仙升上1.8仙，升幅29%。隻輪月底夠鐘，時日無多，溢價10.8%，槓桿率95.3倍，非常高危，博正股由17.15元個幾禮拜內升上18.82元以上好唔實際。
中遠（1199）成為恒指新貴，收7.35元，升5.8%，中遠Call輪9658由32仙彈上49.5仙，升幅55%。正股逼近上次高位，恐有回吐，隻輪追唔過。
章盛