沙士令人疑心生暗鬼，風聲鶴唳，尤其是淘大花園、東頭邨事件，令人觸目驚心，既驚自己間屋唔衞生，又驚樓上樓下唔乾淨。
沙田乃係重災區之一，居民冇法子唔打醒精神，沙田陳太發覺廚房「鋅盆」去水好慢，有積水現象。久唔久重會倒流，當堂為之面青，立即搵師傅嚟「診症」。師傅話：「去水渠塞塞哋，去水喉藏在廚櫃內，唔拆咗佢，好難修理！」師傅話拆廚櫃、換新廚櫃，要五千蚊，陳太唔敢講價，叫師傅快啲整。
一個星期後，師傅駕到，拆去舊嘅蔗渣板廚櫃，嘩，冇眼睇，板內有無數小蟲，板後牆壁黑晒，有好多蟲殼，陳太嚇到幾乎暈咗，諗起呢五年來（蔗渣板廚櫃係業主五年前裝好嘅）洗碗煮飯，竟然係與蟲為伍，小蟲與自己對手只有半吋板之隔，幾乎想嘔。師傅話唔使驚，搵支「殺他死」啦。陳太好唔鍾意「殺他死」陣味，屋企冇存貨，急忙之間，醒起睇《蘋果日報》廣告，買咗一支據講可以殺死九十九點九九巴仙兼有香味嘅噴劑，本來係用嚟噴門口鞋櫃消毒嘅，立即用嚟瘋狂噴蟲。果然有用噃，啲蟲立即死晒，師傅慢慢掃蟲，拆晒蔗渣板，之後用漂白水洗地板洗牆，清理去水管淤塞，換上新嘅夾板廚櫃，忙咗成日，陳太先至安樂番。師傅話：「蔗渣板好易生蟲，濕咗水就係蟲嘅溫床，呢啲蟲專食蔗渣板，每隔三年就好換嘞。」師傅又話夾板唔會生蟲，襟用啲喎！