星期三，大班請客，到快活谷馬場董事廂房做善事，貢獻畀馬會。平時到董事廂房，應酬多過跑馬，皆因按照西方禮儀，主人家梗係邀請夫婦兩人，十二個主客即係六對夫妻。凡此場合，女士多數講兒女經、瘦身經、保健養生經，甚或明星八卦，真係講馬者甚少；男士之中，有一兩個對賽馬只有些少認識，講董伯伯笑話重多過講馬匹血統。試問如此場合，邊會有人專心刨馬、落注？
大班費事講應酬，打破上流社會習慣，一於請客全男班，唔請老婆到場，兼且全部客人都係馬鬼馬精馬主，除咗賭馬，間中只係講吓董伯伯（似乎三個男人坐埋，必然有一個講特首笑話！）
於是精采咯，有人睇沙圈馬匹行圈狀態，有人講練馬師貼士，有人講電腦評分，夾夾埋埋，貼士竟然準到出奇，大家除咗輸死咗隻「鞍山快馬」之外（因為希斯對馬主講機會甚大），場場有錢收，大班更因為岳敦馬房贏兩隻冷馬（勇者、春風得意），贏到開巷。大班於是話：「唔贏錢，嚟馬場做乜，要請你哋食飯飲紅酒㗎！」
馬主K聽貼士別具一格，佢一入場就撞到練馬師，練馬師捉住馬主K猛話自己隻馬有機會、拖六號七號咁話。馬主K本來想買嘅，聽完練馬師咁講，立即唔玩，不落注。佢話：「呢位仁兄叫親我買就實輸，邊會益到我！」咦！靈過鬼，嗰場三隻馬都唔知去咗邊，我哋亦慳番唔少。