母親節，一年只一次；但身為母親的鍾太，就日日都係兒女節！事關鍾太無時無刻都想着如何炮製新款靚餸給子女吃。即使是同一味菜，也不時會整色整水，甜煮變鹹食、蒸魚變又浸又煮……為的原來只是「想仔女多啲返屋企食飯」！
記者：吳佩璇 攝影：陳偉強
逢星期一至三、五刊出
被老公踢爆婚前連飯都唔識煮的鍾太，自從生了大女婉雯之後，便誓做二十四孝媽咪，煲湯、煮餸樣樣學。25年來，普通菜式再也難不倒她。只是仔大女大，識煮餸都未必有人返屋企食！於是鍾太就不斷變招，好似簡單一道煮魷魚，鍾太就加入紅椒、黃椒及青椒，還美名「三椒炒魷」，阿女婉雯猛話菜式搞笑！又例如蒸大眼魚，齋蒸太過嚡口，於是鍾太加入薑葱，又浸又滾又剝皮再加豆醬，還不厭其煩的笑說：「最緊要有人食我就開心！」
其實囡囡婉雯也想多點回家吃飯，只是日頭返工、夜晚又要返學！另方面鍾太之所以如此技癢，與婉雯從小就帶同學返屋企食飯不無關係。原來婉雯從小學到中學，都經常招呼同學仔返屋企，尤其是暑假，一來就是十幾個同學、一坐就是十幾個鐘、每星期嚟足3日！雞粥、湯丸、糖水、炒米粉、水餃、雲吞、魚蛋、雞翼……美食輪流上場。習慣人多熱鬧兼不乏捧場客，難怪兩母女都異口同聲說好懷念那段儼如大家庭的日子！
婉雯自小氣管敏感，容易起痰，加上出來工作後經常熬夜，情況更壞。於是鍾太就睇電視學煲化痰湯水，以紅蘿蔔、馬蹄及瘦肉煲湯。而食不定時的婉雯，除氣管外，腸胃也不很好，不是肚屙就是冇得屙！為轉轉口味，也希望一煲湯可同時化痰及調理腸胃，鍾太向中醫處請教後，再加入有益腸胃及內臟的無花果，及更潤的玉竹。試了這新款湯水後，婉雯話：「條氣明顯順咗，尤其係化痰效果顯著。」
粟米1條、紅蘿蔔半斤、無花果4個、馬蹄5-6粒、瘦肉$10、玉竹少許。
1.馬蹄去皮，粟米及紅蘿蔔切件。
2.瘦肉以豉油及鹽略醃。
3.將2大湯碗水放煲內，煲滾後放入全部材料煲約1小時。惟瘦肉待臨完成前15分鐘才下，並放少許鹽調味。
此味餸乃鍾太的媽媽教落，屬家鄉潮州的家庭餸。原來潮州人愛吃番薯，於是再加入芋頭及排骨這些家常材料，以糖漿來煮。整道菜原本是甜食的，以配合甜番薯的味道。但婉雯由細食到大，吸引力難免大減。於是鍾太就將此傳統家庭菜改為鹹煮，還細致的將番薯及芋頭鋪底，排骨鋪面，增加賣相具吸引力，也可使排骨肉汁滲落底層，入口更惹味。
中型番薯1個、排骨半斤、芋頭半斤