原先以為SARS肆虐香港，股仔難搵機會炒作，估唔到佑威（627）在大股東增持之後，加上一個納米口罩概念，居然炒得有聲有色。
佑威股價在4月尾，由低位0.215元炒上，上周五以0.36元收市，重要唔係乾升，而係有成交支持，真係唔到你唔服。
由於佑威實在升得太急，小初追唔切，故此問經紀陳意見，改為吼佑威姊妹集團金威（910）好唔好？過往兩股經常輪流炒，今次或者有機會重演。金威早前在0.30元水平橫行好一時間，但SARS事件開始後，金威同其他股仔一齊回落，最低見過0.205元。
經紀陳話，幾乎全行都知金威與佑威係同一班人炒作，而金威又係佑威股東之一，炒家在佑威贏到錢，食過番尋味，用同一個概念炒金威，實在唔出奇。
金威上周五在大股東兼主席增持刺激下，大升14%，收0.285元。不過，成交就唔算好大，只得566萬元。經紀陳話，待股價回落後再睇，或者有機會短炒一轉。
慕容小初