昨日是母親節，不少圈中人亦一盡子女本份，與母同賀佳節。向來孝順的梁朝偉便駕着其平治跑車，偕同母親及女友劉嘉玲，在半島酒店享用母親節大餐。偉仔媽咪喜見兒子與嘉玲在風波後仍恩恩愛愛，喜上眉梢，還大讚愛兒夠乖仔。
香港雖然受到非典型肺炎影響，但不少圈中人在昨日的母親節亦冒炎出擊，偕母外出午膳。梁朝偉與劉嘉玲這一對，昨日與偉仔媽咪、偉仔胞妹和妹夫及一對外甥，一同到半島酒店嘉麟樓午膳。
早前偉仔與張曼玉的緋聞一度鬧得熱烘烘，不過在大時大節陪在偉仔身邊的依然是嘉玲。嘉玲與偉仔媽咪全程有傾有講，相信二人感情不錯，也足見嘉玲在梁家心中甚有地位。
送乜禮物唔講得
昨午二時許，穿上一身便服、戴上太陽眼鏡的偉仔搭着外甥膊頭，徐徐步出酒店，偉仔胞妹及妹夫、嘉玲和偉仔媽咪就隨後出現。其間偉仔不時與外甥說話，嘉玲與母親就各站偉仔兩旁，靜候酒店人員取車。
當問到偉仔是否偕母飲茶時，不施脂粉、戴上墨鏡的嘉玲馬上踏前一步，靠近男友身邊，而偉仔就笑說：「係呀。」問他有否送禮給媽咪？他亦保持微笑說：「呢啲嘢唔使講喇啩。」再問他是否常偕母飲茶時，偉仔只笑道：「我今日唔做訪問，唔好意思。」
臨別前耳語一番
記者隨即問偉仔媽咪，有愛兒與嘉玲陪她飲茶是否很欣慰？她便笑得十分開心，並說：「係呀，好開心，佢哋成日都同我飲茶嘅。」未知平日偉仔是否好乖？偉仔媽咪說：「佢好乖㗎。」但當問到偉仔送甚麼給她時，她卻耍手擰頭笑說：「唔好問啦，我講咁多嘢，個仔會鬧我㗎，唔好意思呀。」
及後酒店人員將兩部私家車駛至，嘉玲摟着偉仔媽咪耳語數句後，即笑着向她揮手，而偉仔就充當柴可夫，親自駕着其平治跑車接載嘉玲離去，至於偉仔媽咪就與女兒一家，登上另一部私家車尾隨離開。
預早訂枱有誠意
據知偉仔在日前已致電嘉麟樓訂位，而昨日嘉麟樓座無虛席，幸偉仔一早訂枱兼預訂母親節精選大餐，顯見他對這餐飯也落足心思。
採訪、攝影：何國豪
