八方噚日聽港台節目《與CEO對話》訪問合和主席胡應湘，佢喺節目中自比周伯通，因為重有童心同創造力喎，以哥頓年紀六十有七，都咪話唔服佢。哥頓又話自己一生有兩大驕傲，就係七二年將合和上市，成為首批華資公司利用上市集資，同埋喺廣東建成三百公里嘅公路網。
講到瘀事，哥頓話自己亦有兩大逆境，第一單係六五年銀行擠提，佢幾乎陷於現金周轉問題，但當時佢即刻分析形勢，搵滙豐幫手，最後安然度過；但到九七年金融風暴就冇咁好彩，因為合和要為泰國同印尼項目撇帳達一百億元。𠵱家合和情況已好轉，佢都老懷安慰。佢話日後退休會鑽研歷史，領略人生道理，好似《三國演義》孔明揮淚斬馬稷，就係處理犯錯下屬嘅良好典範。不過佢又話，「香港有人犯錯都唔使斬」，莫非講緊阿松？
（圖）哥頓話退休後會鑽研歷史，學習人生道理。
傳真︰2623-9278
電郵︰