數碼影音:<br>腦場淡市出奇招 數碼相機$30先租後買

數碼影音:
腦場淡市出奇招 數碼相機$30先租後買

香港經濟一跌不起,腦場好多商舖都諗計自救,其中影響較大嘅數碼相機專門店,買新機人數直線向下,可算危城告急。皇室堡一間數碼相機舖,就出奇招增客源,推出租機服務,由千幾蚊到萬幾蚊機都有得租,租金由$30起,用家花少少錢就可以試真部機先買,的確有諗頭。

記者、攝影:徐影龍
ImageGirl:Clara

位於銅鑼灣皇室堡嘅UltraPRO,專賣數碼相機同手提電腦,啱啱推出租用數碼相機服務,以最低$30一日出租。據負責人Ben所述,所有租機非倉底貨或殘缺舊機,而係新簇簇拆盒租出,適當時候會將租過嘅機出口到大陸二手市場,所以毋須擔心租到殘機。顧客需先以現金或信用卡(不過數)支付全數作按金,還機時會扣除租機費用,餘數交還顧客。租機時有幾點要注意,首先係Check清楚機身有冇花痕,跟手試埋機,遠景近攝都要試,最後點算清楚跟機配件,咁就大大減少還機時之爭拗。另外要注意係所有DSLR(單鏡數碼機)均不備鏡頭,亦不設鏡頭租用,須另行自備。

租機旅行至抵玩
目前佔數碼相機市場最多嘅,就係入門級用家同二百萬像素機,佢哋普遍冇咩要求,最緊要簡單易用、機仔細細有賣相。呢類入門機賣價較平,所以租金亦係最低,以二千蚊以下機價計,租金每日只需$30。最啱出門旅行或公幹用途,租夠七日都係$210,重有八折,唔使因為急住出門而買錯機。

入門機熱門型號

ModelClara:
「我好鍾意SONY部壽司機(U20),細細部好盞鬼,拎去旅行放落衫袋都得,又唔使買菲林同曬相,好方便。」

Pro機接Job慳成本
呢類機好啱專接散Job嘅攝影師,面對一啲較迫切工作,都可快速交貨。同行間偶有互相租機習慣,市價一般約$400至$500一天,UltraPRO嘅$180租機價就吸引得多。可惜暫時只提供萬零蚊機種,幾萬蚊機如1DS等則不會考慮。由於CanonEOS-10D全面缺貨,UltraPRO目前只提供NikonD100、CanonD30等型號,不過預計將全面提供萬零蚊嘅機種,各派擁躉都可捧番心水靚機場。

專業機熱門型號

UltraPRO負責人Ben:
「閒時我用DSLR為主,心水機有D100,好多用開菲林機嘅『Pro友』,都較為接受DSLR機,故此提供萬幾蚊嘅高級機租用服務。」

試真水貨買行貨
另一類適合租機嘅人士,就係初接觸數碼相機或頻換新機之人。筆者最常遇到嘅問題,就係:「買咩機好?三百萬像素夠唔夠?」,其實買咩機真係隨個人需要,基本上冇邊部機係無敵嘅。有咗租機服務,大可租幾日玩住先,試清試楚先扑鎚都未遲。尤其係較快到港嘅水貨,試過啱用就遲啲買行貨,就算升級追新機之人,都可慳番唔少冤枉錢。

中價機熱門型號

《Digi數碼雙周》總編輯之達:
「中價機漸漸多人玩,不過賣價一般要三、四千蚊,買錯機好肉赤,租兩日自己試吓先重好過問人。」

部份租機價錢
機價:日租/七天
$1,000至$2,000: $30/八折
$3,001至$4,000: $80/八折
$6,000至$10,000: $150 /八折
$10,000以上: $180 /八折
*最低消費$200

配件租價
a)128MB記憶卡 $10
b)256MB記憶卡 $20
c)專用電池 $10

UltraPro
地址:銅鑼灣皇室堡11樓1123-1124號舖
電話:28817052