五十一歲的張月通和六十四歲的杜成就雖已結婚二十二年，但夫妻依然恩愛，鶼鰈情深。去年杜伯不幸證實患上末期腸癌，張女士一直盼望奇迹出現，可惜最終還是改變不了現實，杜伯在上月尾撒手塵寰。痛失老伴，張女士哭得腸斷，還要為亡夫的殮葬費四出奔波，蘋果基金即時施以援手。
「佢就咁去咗，丟低我一個孤伶伶，我真係好寂寞、好寂寞呀……」張女士哭得死去活來說。
張女士的亡夫杜成就，生前原為保安員，身體一向壯健，去年六月卻突然持續肚痛及食慾不振，經醫生詳細檢查後，證實患上腸癌。「最初我聽到呢個消息，真係接受唔到，甚至諗過自殺陪埋佢一齊去，反而我老公重安慰我，佢好聽醫生講，好樂觀咁去接受治療。」
杜伯去年先後動過手術，並接受過五期化療，奈何始終控制不到病情，張女士慨歎：「我老公個病一路都冇乜起色，癌細胞一路擴散到肝同肺，人就愈嚟愈瘦，臨終嘅時候得番唔夠七十磅。我知佢其實一直都好痛，好辛苦，但佢從來冇喺我面前呻過一句，怕我擔心，佢真係一個好老公，對我好好。」
張女士與丈夫在鄉間邂逅結婚，夫婦育有兩名現年分別二十二歲及十六歲的兒子，可惜親子關係不太理想，長子更已離家多年，音信全無。
「其實我老公好錫兩個仔，不過就因為代溝，同啲仔永遠好似水溝油咁，我𠵱家冇嘢望，希望個大仔知道佢老竇去咗，可以返嚟送佢最後一程。」張女士說。
自長子離家出走後，杜伯一直靠每月五千六百元的薪金獨力支撐一家三口的生活，惟扣除一千四百元的公屋租金及各項雜費後，已所餘無幾，就是杜伯患病期間，想買一點進補食品的錢也沒有，境況堪憐。「我老公病咗之後就冇做嘢，呢一年嚟，我哋都係靠佢份糧尾，同埋鄉下親戚所借嘅些少錢嚟生活，可想而知我哋平日幾慳；我老公病咁耐，乜嘢補品都冇食過，最叻都係飲過幾碗豬肉湯，諗起都陰功。」
杜伯病逝後，張女士不但生活無繼，連殮葬費亦一籌莫展。「以後嘅事，我都唔諗得咁多，有手有腳我唔怕會餓親，𠵱家我最擔心係搞唔掂我老公啲後事。」
由於張女士在港舉目無親，其夫又舉殯在即，蘋果日報慈善基金有見及此，遂於「殮葬專戶」撥款一萬五千元，助其應急。
捐款編號：C0937
暖流熱線
電話：29908688
傳真：23702192
電郵：
網址：