若果各位最近有去日本嘅話，都留意到街頭好多人着運動衫，好似去參加運動會咁，再睇埋藝能界啲女星，濱崎步、安西纊子同乙葉等等，個個都着晒運動裝，原來今夏好興運動totallook。好多日本時裝雜誌都叫讀者今季着得sporty啲，全部講明以籮霸珍妮花洛庇絲（JenniferLopez）自家品牌J.Lo做藍本，但其實籮霸好似着咗好耐囉喎，今次班日本女星又遲人一大截啦！
眾多潮流女將嚟講，步姐一向都係先鋒，始終潮流教祖唔係浪得虛名。其實運動look已經係佢個人品牌MaterialGirl上年其中一個系列，之不過步姐今夏依然活力過人，呢個斜膊排球look都夠煞食啦，唔知步姐有冇學番招鬼影變幻球呢？
講到鍾意追潮流嘅女星，又點可以唔提乙葉呢？乙葉推介各位姊妹sportylook唔使實用，最緊要貼身同加好多閃令令嘅首飾上身，佢話：「𠵱家又唔係真係去打波。」真係夠坦白。
上年仲間由紀惠做日劇《極道老師》都已經係成身體育衫，不過就搞笑居多。而同步姐一樣有自家品牌嘅安西纊子，啲衫雖然平，可惜賣唔去。為咗促銷，難怪安西要話：「我鍾意名牌mix平嘢，最緊要着出自己風格。」所以佢嘅所謂運動裝，真係唔湯唔水。