李蘢怡（Tiffany）大前日單拖去中環置地廣場行街，戴上太陽眼鏡嘅Tiffany，逛咗幾間時裝店都冇乜收穫，於是走去ChristianDior化妝品專門店買唇膏，大約揀咗十分鐘就揀到心頭好。
不過，就馮仁昭所見，Tiffany好似打衝鋒咁行街，行行吓又會忽然返轉頭走入頭先經過間舖頭睇衫，好似好神經質咁。
馮仁昭後尾聽班老友講，Tiffany呢排又拍網上劇集又拍廣告，而且重頻頻走去張玉珊間修身堂減肥，聽講如果佢減得好嘅話，分分鐘有機會做埋代言人。
由於Tiffany鬥心好強，好想一舉成名，所以畀好大壓力自己，搞到成日精神緊張。
Tiffany所屬嘅StarEast老闆譚詠麟（阿倫）、陳百祥同曾志偉見佢咁緊張，於是勸佢得閒多啲行街shopping，幫自己減壓，但勢估唔到Tiffany連行街都咁神經質，真係唔知點收科！
關心妍噚日去銅鑼灣，出席「Kinder繽紛樂關心妍唱K樂」活動。
關心妍話自己好鍾意食朱古力，佢話：「我讀書時一食朱古力就食到停唔到口，所以嗰時係肥妹仔一名，最重嘅時候有成一百二十幾磅。我每次想發脾氣之前，就會食朱古力，因為我覺得食咗之後會開心啲。」
陳見飛同EO2噚日到銅鑼灣京華中心，出席「新城保健日之盈康活靈芝孢子同樂日」活動，曾傳緋聞嘅陳見飛同EO2成員Eddie合照嗰陣表現得有啲尷尬。有傳StarEast股東曾志偉同譚詠麟反面，EO2眾成員話：「我哋成日都聽到佢哋兩個嘈，不過都係睇波同踢波時嘈。」
香港𠵱家嘅非典感染人數雖然係已經有下降趨勢，但係搭飛機焗住喺機艙幾個鐘頭，就更加要小心，好似周杰倫噚日去大馬，為嚟緊禮拜六舉行嘅演唱會做準備時，佢喺大馬機場就已經戴上一個豬嘴口罩，而且只係同fans揮手，費事同fans有身體接觸嘛！
組合E-Kids噚日去香港仔中心，出席「飛天舞會」活動，E-Kids嘅Tommy話聽日係佢牛一大日子，前日喺商台門口收到fans嘅禮物，佢一拆就見到有一盒生果味嘅安全套。Tommy話佢咁大個仔都未用過安全套，而且佢暫時都唔需要用，因為佢未有女朋友喎！
