【本報訊】身為兩子之母的教育統籌局常任秘書長羅范椒芬，在母親節看到身在外國讀書的兒子的電郵，感覺震撼；然而在非典型肺炎下，慨歎生命脆弱，呼籲大家好好珍惜眼前人。
羅太昨出席商台節目《政好星期天》時說：「今朝早我一起身開電腦，就已經睇到佢哋嘅信件，係好感動嘅。嗰一刻，睇到佢哋寫話感謝母親為佢做嘅，感謝……如果冇咗母親，佢今日唔會有咁樣嘅成就，嗰兩句說話係好能夠震撼。」
她強調，每次母親節，都會收到囝囝電郵，「真係令我感覺到，我為佢做嘅嘢──一年做嘅嘢，都係好值得嘅。」同時，她又很懷念自己的母親，慨歎「人都係好脆弱嘅，正所謂『樹欲靜而風不息』；尤其係最近非典型肺炎，奪去咗好多母親嘅生命，所以我哋更加需要隨時隨地，珍惜自己身邊嘅人。」
羅太憶述以往，自己工作忙碌，對當時仍年幼的兩名兒子甚感抱歉，幸與媽媽同住，代為看顧，讓他們不致學壞，而且「好生性」。
她尤對長子感到抱歉，因為當時「冇咁識教」，一年級就為他請來補習老師；後來她較懂得父母之道，給予幼子較大空間，以致幼子較成熟；甚至有人說：「你細仔點解睇落好似大仔咁！」