母愛偉大，一年一度嘅母親節，做仔女嘅點都要表示一吓，向全年辛勞嘅媽媽致敬，市民大眾同高官名人都冇分別，最熱門嘅節目就係請媽咪去飲茶。咁邊度係啲高官名人同媽咪老婆慶祝佳節嘅熱點呢？八方話過你聽，熱門飲茶食肆原來係中環鏞記酒家。
噚日政務司司長曾蔭權同細佬曾蔭培兩家人，就同埋老婆仔女兼孫女三代同堂去鏞記飲茶慶祝母親節，食到飽飽後，一哥個仔抱住B女小凱明準備上車，跟住冇耐就見到煲呔走出嚟，煲呔就搣一搣細佬粒孫女面珠「登」道別。一哥噚日心情極靚，重同影相嘅記者講：「哈，我孫女俾你哋影咗相㖭。」
曾家離開冇耐，梁振英一家幾口亦步出鏞記，問佢點過母親節，梁振英就笑笑口話：「年年都係咁啦。」至於送乜嘢禮物畀太太？佢就指住兩個女話：「呢啲由佢哋負責。」
傳真︰2623-9278
電郵︰
