喺歐洲四大聯賽當中，德甲聯似乎係最唔受歡迎；但係，我求大俠可以話畀大家聽，餘下兩周德甲聯應該會幾好睇，事關四隊波爭緊兩個歐冠盃參賽權，如果有電視台直播，可以一睇。
雖然拜仁提早封王，但咪以為今屆德甲聯就咁玩完；德甲聯只得三個歐冠盃資格，唔似英超聯、西甲聯同意甲聯咁有四席，所以啲球隊為咗攞嗰千二萬歐元改善財政，真係會搏晒老命比賽。𠵱家第二位同第五位得五分距離，真係唔知多蒙特、史特加、漢堡同哈化四隊波中，邊兩隊可以同拜仁齊齊踢下屆歐冠盃。
榜尾形勢一樣緊湊，科特布斯肯定降班，紐倫堡亦九降，究竟喺上屆攞咗三個亞軍嘅利華古遜可唔可以逃出生天，本月尾自有分曉。
呢個禮拜六有足總盃決賽同意甲聯，如無意外收費台都唔會直播德甲聯；但係，既然意甲聯基本上大局已定，收費台會唔會考慮一吓直播德甲聯呀？
德國神醫多，好多重創嘅球員好似奧雲同謝拉特，都會搵德甲聯嘅軍醫幫手。但多蒙特教練森馬話明由下屆唔會同軍醫松德恩合作，理由係對方太渣。今次係森馬上任後第二次換軍醫，森馬當年隻腳醫咗三年都醫唔好，搞到三十三歲就退休，所以佢對軍醫特別挑剔啩。
效力1860嘅邵佳一喺上個禮拜六終攞到佢喺德甲聯首個入球。我求大俠接到呢單料後覺得好開心，事關中國球員最近喺歐洲球壇發展麻麻，好似英超李鐵同孫繼海喺愛華頓同曼城都攞唔到正選；希望邵佳一呢個入球可以幫喺歐洲搵食嘅中國球員沖喜吓。
比甲球會隆姆因為財政困難而要賣球員還債，最後賣剩十三個球員，竟無法繼續派隊出賽！比利時足總就決定取消佢哋今季所有聯賽戰果，有啲曾兩勝隆姆嘅球會就要「嘔」返六分出嚟，無端令排名下跌！其實𠵱家英超、意甲等都有唔少球會鬧財政問題，隆姆事件算唔算係警號呢！
早排炒咗教練施拉斯嘅NBA黃蜂隊，正物色新主帥領軍，前紐約人名教頭雲根迪是人選之一，但雲根迪一口就拒絕咗黃蜂，佢話好滿意目前自己喺電視台球評家嘅角色。梗係啦，睇住施拉斯教到球隊有成績有進步兼入咗季後賽都要「炒魷」，呢份工肯定好惡啃！
近年唔少有啲名氣嘅球員鍾意去中東球會落班掘金，好似羅馬里奧、沙治奧咁。但當中又好少成功例子，你慌唔係見人哋聯賽水平唔高，錢就收足，但就只交行貨咩！唔係亂噏㗎，最新又有簡察斯基（圖）同埋喀麥隆世盃國腳索科執包袱，佢哋都係因為踢得差，幫唔到沙地球隊艾希拉攞好成績，踢咗半季左右就俾人炒魷囉！