九個月前，陳慧嫻患上焦慮症，雖然身體抱恙，但沒有這個病，她又不會遇上醫生男友謝國麟，今次月老為她牽紅線，倒真很巧妙。
陳慧嫻向來十分健康，但去年暑假，她從英國度假回港後，開始發覺身體出現毛病，不停感冒、咳嗽、呼吸困難，起初她以為自己患上肺病。直至有一晚，她在晚飯途中，突然心跳加速、天旋地轉、口渴、打冷震、無法呼吸，傭人嚇得馬上帶她到養和醫院求診。
陳慧嫻說：「舊年八月尾，我睇醫生之後，發覺自己有焦慮症，醫生解釋畀我聽，每個人都會有憂慮，太憂慮會令人好緊張，有呢個病嘅時間，我會頭暈、坐唔定、唔安寧，成日走嚟走去，六神無主。
「我覺得焦慮，原來係因為生活太悠閒，我上一次出碟係大前年，之後冇做嘢，個人冇咗目標，冇寄託，但身邊個個人都返緊工，我就好似好冇用咁，我重開始懷疑呢種生活好唔掂，令我無乜存在價值。
「我又有諗過讀番書，但我自己住，養咗七隻貓，我唔捨得佢哋，我爹哋媽咪開始老啦，細妹移民去咗加拿大，細佬先開始做嘢，我唔可以話走就走咁瀟灑，我有好多嘢要顧慮。」
陳慧嫻續說：「𠵱家我重有食藥，其實醫生話我可以停食，但我唔想停，遲吓我又開演唱會，我驚緊張，relax唔到，所以就食住先，以防復發。」
正因為患過焦慮症，陳慧嫻才意識到，自己不是一個能夠停下來的人，有工作有寄託，這樣的人生才令她覺得有價值。