今日英超煞科，好多人重估緊邊個會成為今屆神射手，好似網站《Sporting-life》就推介有九倍分頭嘅比亞堤仍然值博，但我求大俠就覺得搵笨、咪落搭；計我話雲尼斯達羅攞呢個獎應該無走雞。
𠵱家雲尼斯達羅響射手榜分別領先亨利同埋比亞堤一球，表面上，比亞堤九倍分頭唔錯，但記住假如有兩個最後平頭，中咗就賠得一半，三個平頭就更加賠得三分一，唔見得抵買。重有，阿仙奴下個禮拜同修咸頓爭足總盃，兩個射手今日落唔落場，或者踢幾耐都屬未知之數。
再講，雲尼斯達羅差三球就可以平曼聯名宿丹尼士羅一季最多入球紀錄（四十六球），佢應該係作客愛華頓時最想博嘅曼聯球員，佢一入球，亨利同比亞堤就要追兩球至平頭，唔易追噃。
英球壇最近熱門話題莫過於熱刺棄用老將舒寧咸，不過老舒躉唔使擔心，樸茨茅夫領隊哈利列納已經開到聲話好想招納呢位三十七歲嘅前英國腳。假如成事，老舒將會同麥臣（三十五歲）、史東（三十一歲）、費斯達（三十四歲）同埋舒活（三十四歲）呢班老鬼合組英超「新老人兵團」！
車路士同利物浦今日爭下屆歐冠盃最後一個參賽席位，場波同踢決賽冇乜分別。車仔領隊雲尼亞里賽前出口術，話紅軍唔鍾意踢進攻足球，淨係等機會打反擊。其實，車仔和波都掂，反而紅軍非勝不可。依我求大俠所見，雲尼亞里係驚咗奧雲同巴路士啲反擊，想用激將法至真！
前影星積尼高遜噚日幫落後嘅湖人打氣，重緊張過教練積遜；當第二節奧尼爾被第三度吹罰，佢即刻彈起身勁罵球證，差啲要俾保安押離場。佢重大聲講自己買貴飛唔應該有咁嘅待遇。但「積佬」你身處喺成日講平等嘅美國，話之你坐前排抑或山頂位，唔係有錢有面就大晒㗎！
塞爾特人喺東岸次圈對網隊連輸三場，完全俾網隊剋死；鬼咩，塞軍「孖寶」之一嘅獲加始終鬥唔過馬田，命中率低到喊，加上塞軍其餘球員冇個打出水準，令到得分王皮雅斯一個人打到殘晒。
聽聞大腿拉傷膝頭又痛，睇怕塞軍要創造紀錄，成為首支落後○比三成功反勝嘅球隊都好難囉！