政府將沙士中招總數劃分為「感染」與「懷疑」。前者降到單位數的同時，懷疑病例依然日日廿幾三十件。這樣的所謂疫情受控，叫人難以安寢。這樣的母親節，戒備難以鬆懈。為人子女，擔憂年邁父母身子弱易中招。做父母的，替出外拼搏搵食的仔女食唔安坐唔落。兩代人愁懷別抱。母親節來了，是應當慶祝的。慶祝闔家仍然平安，全家圍坐歎下一盅兩件，原來不是奉旨做得到的。
大部份人認為母親節是向母親表露愛意的經典日子，孝子乖女粉墨登場，是節日指定動作。經沙士一役，應該有另類體會。不如掉轉頭，由母親戴住口罩，跟仔女說聲真的愛你。你或者認為多此一舉，認定阿媽痛惜仔女天經地義。咁就錯得離譜。幾多母子?女關係惡劣，是阿媽一手促成。阿媽偏心，阿媽動輒發爛渣；阿媽最鍾意將子女倒模、監控、扭曲的案例多的是。女人做人阿媽後，忘記自己也曾年輕反叛乞人憎過。沒有一顆寬容的心，兩代只能重複走積怨的舊路。直到一方先離去，血緣牽纏在一團的結，至死未能解開。沙士迫我們隔離反省，母親若是急性子的，請慢下動作來。終日嚕囌抱怨子女唔聽教令你槌心揪肺的，請想像自己在ICU插晒喉，你個肺，夠唔聽你使啦！愛惜自己、寬容八達地愛惜自己人，母親節一年一遇咁大把，媽媽，你就試一次好嗎？