時裝店「Ztampz」老闆娘羅可旋與施念慈這對好朋友，為了今天的母親節，早前一同前往選購手表給母親作禮物。施念慈最希望母親能快點找個老伴，羅可旋則讚揚母親是個堅強的嚴母。
時裝店「Ztampz」老闆娘羅可旋與施念慈既是好友，也是賓主關係，二人早前相約一同選購母親節禮物，更不約而同選中一隻價值一萬九千八百元的Leonard「Screen」系列腕表作禮，並同時在卡上寫上祝福字句。
羅可旋與施念慈均已為人妻，要學習與奶奶相處，二人同感現在儼如有兩個母親。施念慈在一個單親家庭中長大，自小母親對她的管教亦很嚴，她說：「可以話係冇賞有罰嘅，我考第二佢都鬧，𠵱家諗番先明白媽咪其實係想我讀好書啫。」施念慈續說：「我𠵱家結咗婚先感覺到，有個伴係好緊要嘅，我眼見媽咪為咗專心照顧我，而錯失咗好多識異性嘅機會，所以我母親節嘅願望，係希望媽咪可以快啲搵番個伴。」
羅可旋則表示母親是個傳統的嚴母，她說：「細細個媽咪已經教我哋唔可以太注重物質，凡有親戚送禮物畀我哋幾兄弟姊妹，媽咪都會即時退番畀人。佢對我哋管教好嚴，中學都唔准我哋出夜街，我都係好大個先至知蘭桂坊係點嘅。」
羅可旋續說：「媽咪重好叻好本事，當年佢一個女人帶我哋六兄弟姊妹去加拿大坐移民監，一個人照顧晒我哋嘅生活同學業。
「佢思想好傳統，認為女人結咗婚就要以家庭為重，所以佢成日叫我唔好太投入時裝店生意，話家庭事業要有平衡，佢重同我講，唔好以為第時生咗BB就交畀佢湊，到時就繼續返工，佢唔會幫我湊BB㗎，媽咪話一定要我自己湊番先得。」
採訪：RitaLeung
攝影：MatthewLam
場地提供：太古廣場連卡佛
鳴謝：Leonard
