喺非典肺影響下，好多行業都受到史無前例嘅衝擊，好似做化妝品零售嘅莎莎（178）咁，生意少咗3成都唔止，不過由於近日疫情好似穩定咗啲，有行家話可以留意番隻股。有部份醫生估計沙士可能喺未來一兩個月內初步受到控制，到時大家唔再需要口罩，要以真面目示人，莎莎嘅生意又會返嚟。
不過，據有部份同管理層見過面嘅行家講，莎莎重未係時候吸納，皆因喺非典肺之下，內地今年嘅五一黃金周已經無咗，如果內地疫情重未受控嘅話，分分鐘連十一國慶都會受到影響。若然無咗呢批瘋狂搶購名牌化妝品嘅內地顧客，莎莎嘅生意都好難好轉，伏勝都係睇定啲先。
呢一排魚缸真係靜得好緊要，雖然話每日閒閒地都有70零億銀成交，但係啲股仔嘅成交真係細得好可憐，同往日細價股佔大市成交一半有多嘅日子分別好大。對於已經吊緊命嘅行家嚟講，為咗生計迫不得已都要經常下海炒番一兩轉，好彩就贏番一千幾百，實行做股市嘅拚命三郎，不過，收場唔係個個都咁好。
話說有個專幫客炒細價股嘅行家，上兩個禮拜收到個客嘅買盤，話要買1000萬股奧瑪仕（959），話隻股已經搞掂內部債務重組，重得到有力大戶嘅扶助，好大機會升番上去1毫子，以復牌當日嘅收市價3仙4計，都有成兩個開。個行家以為有着數，唔單止幫個客買咗成千萬股，重手多多買多幾百萬股，諗住實食冇黐牙，點知隻股升咗一陣就唔見晒啲買盤，最慘就係連個客都唔見埋，結果個行家俾老闆省咗一輪，還要硬啃咗個客批貨，真係賠了夫人又折兵，奉勸各位行家小心。
伏勝