在這個歌頌母愛偉大的節日，一群「沙士」孤兒卻要度過沒有媽媽的母親節。一場非典型肺炎風暴，已令最少四十個家庭的小朋友，失去父親或母親，甚至雙親。「有媽的孩子像個寶」這個歌謠大家都會唱，亦能深深體會被母愛包容是多麼幸福的事情。對於剛失去至親的孩子而言，今天卻是徒添傷感的日子。
失去母親的兒童，更加需要社會、需要你，去多付出一分關懷、一分愛心。沙士奪走了二百多條人命，激起了香港人同舟共濟之心。「沙士」孤兒，你們並不孤單，因為你們是七百萬香港人的孩子。對於因奪命肺炎而失去親人的小孩子，各界人士包括演藝界，齊伸出溫情的手。
身在外地的周潤發昨日透過長途電話說：「沙士呢個病令到好多不幸嘅香港人死亡，呢件係好令人悲痛嘅事，我知道有部份孤雛，因為年紀好細，所以唔懂事，甚至可能連媽媽唔喺度都唔知。政府同教育當局應該諗辦法睇吓點樣幫佢哋，等佢哋可以度過呢個艱難嘅時刻，我知道商界都有好多籌款活動，演藝人協會都有籌款，我自己都有捐錢。今次係一場戰爭，但我哋唔係同炮彈作戰，而係同病毒作戰，大家喺悲痛之餘，同時都要重拾信心去打呢場仗。相信時間可以沖淡傷痛，痛失母親嘅兒童，要振作做人，因為社會上有好多人好關心你哋，同時你哋亦要堅強啲，先至可以面對以後種種嘅困難。」
陳慧琳則表示：「媽媽係好偉大嘅，媽媽從來冇諗過照顧子女要得到乜嘢榮譽同讚美，佢哋唔會覺得自己喺母親節時係要大晒嘅，媽媽最大嘅願望唔係為自己，唔係要得到啲乜嘢禮物，而係見到佢哋啲仔女健健康康，開開心心咁過日子。𠵱家雖然有唔開心嘅事發生咗，有啲孩子嘅媽媽不幸去世，但作為子女應該明白媽媽都唔想咁，所以你哋更應該開開心心同其他家人一齊，好好咁過日子，堅強勇敢咁面對一切，努力做個有用嘅人，咁喺天國嘅媽媽先會開心，亦可以當係母親節禮物。」
螢幕上的好媽媽薛家燕說：「我已經準備咗一批用『家燕媽媽』做嘜頭嘅咕𠱸同公仔，諗住送畀因為SARS而冇咗親人嘅小朋友，𠵱家聯絡緊用乜嘢途徑送畀佢哋。我明白冇咗親人、冇咗媽媽，小朋友一定會好難過，但無論點，都希望佢哋可以堅強，因為成長嘅路好長，重有好多嘢要面對，希望外界畀多啲關懷同溫暖佢哋，政府應該成立基金培育佢哋，因為除咗親情之外，小朋友成長亦要一定嘅經濟支持。如果時間許可嘅話，我好想探吓佢哋，帶佢哋一齊出去玩，傾吓心事。香港經歷咗沙士，發現原來好多人好有愛心，希望大家發揮團結精神，幫助呢批小朋友。」
近期人氣急升的陳豪說：「我好明白小朋友冇咗爸爸媽媽嘅感受，因為，我細細個已經冇咗爸爸，由媽咪一手養大我；我希望嗰啲失去父母嘅小朋友，千祈唔好因為自己同其他小朋友唔同，而產生一種自卑嘅心理，覺得自己處處比唔起人哋；相反，小朋友應該好堅強好健康咁生活落去，長大成人，更加珍惜生命，熱愛生命，咁樣做嘅話，父母在天有靈都會覺得安慰，為自己子女咁生性而感到自豪。此外，對於嗰啲失去子女嘅父母，我亦都寄望佢可以好堅強咁企番起身，好堅強咁生活落去。」
