李宗盛原定噚日朝早要去上海一間電視台，為抗炎晚會節目錄影，但係李宗盛冇出現，現場嘅製片即時聯絡李宗盛助手，助手話佢身體不適所以取消演出。不過李宗盛下晝就走咗去出席康師傅綠茶嘅宣傳活動，令人懷疑佢只肯參加商業活動。
喺記者會上，李宗盛對於記者嘅問題只係輕輕帶過，佢話自己冇病，亦冇發燒，身體好健康，發生咁嘅事係誤會，可能係溝通上出咗問題啫。而宣傳活動完咗之後，李宗盛就即刻趕咗去上海嘅東方明珠塔錄影嗰個抗炎晚會。而原本製作單位諗住搵佢唱嘅歌曲《真心英雄》已經俾其他歌手唱咗，李宗盛惟有唱佢作畀個女嗰首歌《希望》。
此外，李宗盛前妻朱衞茵嘅家姐因為懷疑感染非典，所以朱衞茵都主動喺台灣隔離自己，問李宗盛知唔知件事，佢用國語講：「我知道這件事，我們一直有電話聯絡，我不會不管的，但這始終是我的家事，所以不便多講。」
鄭希怡（Yumiko）噚日去尖沙嘴同歌迷一齊唱K，Yumiko最近忙緊搬屋嘅嘢，佢話都準備得七七八八，不過𠵱家執嚟執去都淨係執到啲冬天衫，Yumiko話：「因為我執吓嘢，又會睇吓以前啲相，所以執咗成晚都淨係執到嗰少少。」問Yumiko有冇叫老闆楊受成送入伙禮物，佢話：「冇呀，諗吓有冇貴嘢買先，佢都冇話會送。」
黎燕珊噚日帶咗對仔女去貝沙灣睇示範單位，佢對貝沙灣啲單位讚不絕口，問佢會唔會考慮買番間，佢話：「今日嚟睇完，覺得距離我嘅目標都唔係差好遠。」講到佢前夫劉永話未有能力撫養對仔女，阿珊話：「佢好似同傳媒做交代咁，對我嚟講唔係乜嘢咁出奇，離婚到𠵱家，我都係獨力去撐。」
組合Shine噚日去灣仔擔任「NewayShine全港中學生3on3Jump霸戰」嘅嘉賓，重落埋場同歌迷一齊比賽。對於有報道指余文樂同鍾欣桐分手，身為阿樂老友嘅徐天佑同黃又南都話唔清楚呢件事，而且都唔會問對方咁多。Shine重話絕對唔信阿樂會借酒澆愁，因為佢哋知道阿樂一直都冇飲酒呢個習慣。
導演譚朗昌前年涉嫌盜錄自己監製、華藝投資嘅劇集《斷仇谷》，呢單案大前日喺瀋陽審結，結果要賠償七十五萬港幣畀華藝同支付十九萬堂費，並入獄八個月，但扣除佢之前被押留嘅時間後，就唔使再服刑。不過譚朗昌大舅巫先生噚日同馮仁昭澄清，譚朗昌只係盜錄而唔係盜版，兩個罪名其實相差好遠，所以有必要解釋清楚喎！
