加州大學柏克萊分校宣布因為沙士問題，唔收中台港三地嘅學生讀暑期班，令好多人大失所望。沙士一日不除，香港人永無寧日，所以滅炎是當務之急，預留十億元去宣傳香港，盞益咗外國公關公司、廣告公司（好似用九百萬元搞出一條飛龍標誌咁），冇乜實用。
馮華健去唔成美國開會，拉斯維加斯唔畀香港珠寶商入場參展，柏克萊唔收中台港暑期生，皆拜沙士所賜，沙士再拖落去，香港人只能劃地為牢，出唔到鯉魚門，香港變成死港。美國機構點解唔畀沙士疫區人士參加大型活動呢，睇嚟主要係保險公司從中作梗。只要佢哋一聲不受保，美國主辦機構一定腳軟、投降。
加州州政府今年財赤驚人（三百五十億美元），為咗度過炎夏，要發行一百一十億美元債券，用嚟應付至到七月一日嘅政嘅開支，冇嘅話，加州州政府服務怕要停頓，公務員出唔到糧。
正因為財政關係，加州大學被逼大削預算，紮實肚皮，一啲額外錢都冇，故此，如果萬一不幸假如中台港學生將沙士帶入，柏克萊根本冇錢應付醫療開支，亦唔肯因此而購買昂貴沙士保險。柏克萊校長RobertBerdahl發表聲明，表示遺憾，佢話採取如此行動，係大學保健總監PokiNamkung極力主張嘅，柏克萊既然如此，大概UCLA及其他分校都會跟風，只希望沙士快啲過去，唔好影響香港學生秋季美國入學！