雖然「沙士」仍然肆虐，但今日係母親節，各位囝囝囡囡點都要有啲表示嘅。民政事務局局長何志平同工商及科技局局長唐英年噚日出席「清洗戲院齊鼓舞」活動時，何志平同八方講，疫情已經開始受控，市民應該趁母親節同媽咪行街街消費吓，盡孝心之餘又可以為刺激香港經濟，一舉兩得。
究竟何局長點樣慶祝呢？佢笑笑口，話屋企有兩個媽咪，所以都要花啲心思，不過食餐飯就梗唔少得喎。咁會唔會一家大細去睇戲，幫戲院業打打氣呢？原來何志平最想睇《22世紀殺人網絡2決戰未來》，但套戲未上畫。至於《變種特攻2》，佢就話睇過啲宣傳片，個人覺得麻麻地。不過唐英年上次入戲院刺激經濟，就似乎比何志平政治正確，揀咗套港產片《PTU》。
傳真︰2623-9278
電郵︰