陳慧嫻自言復出與錢無關，她形容若節衣縮食的話，已下半生無憂，復出只因為興趣與預防焦慮症，雖則遇正非典型肺炎肆虐，但她並不擔心。
陳慧嫻說：「我今次係想自己精神有寄託，唔會理賣咗幾多張碟，有幾多人會去睇我嘅演唱會，擔心呢啲嘢真係會好辛苦。今次我喺演唱會入面，想畀大家睇陳慧嫻最真實嘅一面，亦度緊做棟篤笑。」
重返樂壇的陳慧嫻仍會拼，更不擔心與偶像新人競爭，而在芸芸新人之中，陳慧嫻最看好關心妍，她說：「關心妍真係掂喎，佢好似陳美齡，唔係叫靚，但特別；Juno（麥浚龍）都OK，你話佢個樣怪又好，靚仔又好，有次我頒新人獎畀佢，至少同我有眼神接觸，有啲人一攞獎對眼即刻望第二度，佢好有禮貌。」
當年陳慧嫻初出道時，與黎芷珊及陳樂敏組成「少女雜誌」，結果她跑出，作個人發展後更獨當一面，去年英皇以同一橋段推出由鄭希怡（Yumiko）、蔣雅文及劉思惠組成3T，三人灌錄細碟《少女蝶》，彈出的Yumiko率先推出個人唱片。少女鼻祖陳慧嫻對此說：「我淨係識Yumiko，其他兩個真係諗唔到個名，我覺得『少女雜誌』成功啲，我哋三個靚啲。」
以前陳慧嫻與周慧敏同被譽為玉女，放眼現今娛圈，未知陳慧嫻覺得誰有潛質做玉女接班人？她即說：「重唔係關心妍？一定係佢啦。」
現年三十八歲的陳慧嫻長得一張娃娃臉，跟二十年前初出道時變化不大，但不老傳說倒令她覺得很矛盾，她說：「我年紀唔細，個樣就細，有好有唔好啦，有啲人會覺得我係怪人，家陣幾多歲呀？重係咁嘅樣嘅？」問陳慧嫻有何駐顏心得？生活健康、不煙不酒的她說：「開心，呢樣真係最緊要。」
撰文：朱芷瑩
攝影：仇志德
髮型：BillyChoi（HairCulture）
化妝：ArrisLaw
場地提供：帝苑酒店