較早前，日本豐田車廠公布咗豐田、大發及日野喺今年三月嘅製造、銷售及出口數據，成績絕能令人感到滿意；其中位於日本本土嘅生產線，豐田共生產咗322,058部新車，較去年同期上升2.4%，當中私家車佔286,104部，而貨車及巴士等商用車則有35,954部。至於同屬豐田旗下嘅大發及日野，亦分別產製出63,858及6,564部新車，升幅分別為9.5%及23.6%；而豐田及大發位於海外嘅生產線，則產製出204,413及2,700部新車，升幅亦高達12.7%及51.9%呢！
至於銷售數字方面，豐田於日本本土共售出230,933部新車，較去年同期上升8.7%，而大發為73,292部（升9.1%）、日野則為7,113部（升9.4%）。響出口方面，豐田及大發分別下跌3.6%及2.9%，出口汽車數目為140,436及6,298部；但話雖如此，日野卻於出口汽車數目上錄得高達41.7%嘅升幅（出口車輛數目達2,952部），成績可謂十分出色。相信新款豐田Wish及Harrier（即港版凌志RX300）等新車系於早前陸續推出後，豐田今年全年嘅銷售成績定會再創高峯呢！