上兩日八方咪話四位女高官牽頭搞護幼教育基金，班男人唔知去晒邊。點知此語一出，發起人李麗娟就話唔多公平。有眾人媽打之稱嘅李麗娟話，其實男同事都好支持，有唔少重親自送支票嚟㖭。
前日《蘋果》頭版《淘大孤雛不怨天》，提到一位五歲小男孩係足球迷，李麗娟原本想送張碧咸海報畀佢，點知佢話喜歡奧雲。報道一出街啫，中午十二點馬會已經有人聯絡媽打，話有張奧雲海報想轉交畀呢位小朋友，速度快到得人驚。雖然民政同馬會曾經為賭波拗到面紅耳赤，但媽打都話估唔到呢班馬會中人「鐵漢柔情」，夠晒愛心兼細心。
不過今日母親節，相信乜嘢海報都取代唔到親愛嘅媽媽，李麗娟話佢好理解班小朋友嘅感受，因為李麗娟爸爸去世三十幾年，自己亦好思念佢，所以直到𠵱家，每晚睡前媽打都會在心中同爸爸傾偈。
「媽打」建議班小朋友可以用佢嘅方法，就會感受到媽媽其實一直都冇離開，而係喺身邊保佑佢哋。「媽打」重話今日可能會同林鄭月娥、羅范椒芬以及陳馮富珍幾個聯絡吓啲小朋友，向佢哋表達關懷之意。
﹙圖﹚李麗娟同三位女高官搞護幼基金獲廣泛支持。
傳真︰2623-9278
電郵︰