香港國際唱片業協會撥款二十萬捐贈「護幼教育基金」，噚日李克勤、陳慧琳（Kelly）同黃凱芹就代表將支票交畀基金發起人之一、社會福利署署長林鄭月娥。
李克勤話香港人一向都好熱心，何況今次非典型肺炎係喺自己地方發生，自然更加落力。不過克勤話雖然感染數字回落，個心重有少少忐忑。問克勤係咪質疑政府嘅誠信時，佢話：「因呢個病係長久作戰，所以想啲人唔好鬆懈啫。」不過佢不諱言希望公布嘅數字唔係玩數字遊戲喎。
至於Kelly被問到有份演出嘅電影《無間道III》是非多多時，Kelly笑笑口咁話：「劇本未出就已經咁多新聞，相信啲新聞有排炒。」
陳司翰（Victor）前日喺台灣同劇集《又見橘花香》嘅演員去電視台宣傳，順道慶祝埋生日。佢收到個波霸美女造型嘅蛋糕時，竟然笑到講唔到嘢，最後食咗兩啖就玩掟蛋糕。電視台重特別安排Victor媽咪同佢通電話，家姐陳慧琳亦喺阿媽側邊，因為陳媽媽太耐冇見過個仔，不斷問Victor近況，搞到Kelly冇機會搭嘴。
張敏噚日揸住架跑車途經紅棉道時，俾架貨車撞到車尾，因為當時正值繁忙時間，所以搞到有啲塞車。當張敏落車睇吓架車撞成點時，就發覺貨車司機赤膊兼有紋身，對方又同佢講話只係小事，張敏諗對方都係揸車搵食啫，所以就咁算數。點知後尾再睇時發覺車身原來都凹咗，重有兩條大痕，搞到佢鬼咁心痛。
羅慧娟噚日帶埋媽咪去尖沙嘴出席無綫「好媽媽為您加油」記者會，兩母女重即場煎蘿蔔糕，慰勞現場嘉賓。問娟妹平時多唔多下廚，佢話：「其實我都識煮嘢嘅，因為以前喺有線做過烹飪節目，不過喺屋企就好少入廚，因為媽咪覺得廚房係佢嘅地方，唔係咁鍾意我入去。」
關心妍（Jade）噚日去港台出席《開心日報》活動，有報道指佢喺加拿大讀書時成日同外國男仔拍拖，阿Jade猛話本雜誌睇得起佢，因為佢當時係肥妹仔一名，相信只有佢前男友先要得佢落。阿Jade又話自己係一個好傳統嘅中國女性，所以一定唔會揀外國人做男朋友喎。
