假後港股生生猛猛，唔理假期內美股連跌兩日。沙士宗數減少，為港股提供助力。
滙豐（005）升2.25元，幅度2.6%，論升幅，好多大藍籌勁過佢，但滙豐好多Call輪嘅槓桿率勁爆，所以上榜最多嘅藍籌輪就係滙豐Call輪。最經典嘅係9628，由1.1仙飛上5.5仙，升幅係400%，但只得4萬幾銀成交金額。隻輪月杪到期，行使價90元，𠵱家少少價外，未來幾日，可能再升1倍（如果正股再升2元），亦可能只值1仙（如正股唔郁或者下跌）。
恒指Call輪最威嘅係9663，有大成交，幾乎200球，收1.9仙，升46%。仙輪槓桿率大，輪價細，波幅易誇張。恒指9000以上唔易再大升，買呢類Call輪要有輸得好勁嘅心理準備。
國內股市下周一重開，國企股跌定嚟等，華能（902）收7.10元，跌15仙。華能例牌上吓落吓，低位可吼吓Call輪，對象係9728，成交唔多，但已經多過其他同類輪，9月到期，現價99仙，溢價5.5%，槓桿率7.2倍。
思捷（330）批股，收14.70元，跌65仙，收市價同批股價相同。思捷Call輪9610，收15.4仙，散31%。隻輪今個月底夠鐘，溢價0.6%，槓桿率9.6倍。正股調整一輪，有機會好番少少，9610亦有機會彈番上去。
章盛