漂亮新娘易笑易哭顯真我
周麗淇右眼縫針素臉示人

周麗淇成為最新一期婚紗雜誌封面人物，她接受訪問時表示自己大情大性，喜歡在開心的工作環境下工作，所以常逗工作人員笑。而早前她因為動了眼部手術，眼部不能化妝，昨日她亦樂於以真面目示人。

周麗淇（Niki）日前穿上純白婚紗，以漂亮新娘子造型擔任最新一期《新婚通信》封面人物，訪問中伊人談及自己的個性，愛笑易哭是她特質，勇於表達喜怒哀樂正是她最真最自我的一面。
Niki說：「我鍾意笑，當其他人見到你笑嘅時候，就會覺得你好親切，我覺得一班人做嘢嘅時候最緊要係開開心心，所以我好少黑起塊面對住人哋。」

樂觀對疫境
擁有開心果性格的Niki表示遇到不開心事，會找人傾訴，壓力才能慢慢紓解，她說：「就算𠵱家大家面對非典型肺炎呢樣咁唔開心嘅嘢，都應該抱住樂觀、積極嘅態度去面對。」
Niki也是個易哭的人，她說：「只要我一睇感情戲，或者身邊嘅人發生悲慘嘅事，我啲眼淚都會唔受控制咁流出嚟，我覺得大情大性、勇於表達自己喜怒哀樂情緒係我最舒服、最真嘅一面。」

「眼白有粒嘢」
此外，Niki昨日為無綫新劇試造型時表示早前眼部做了小手術，目前不能化妝及需戒口，她說：「我讀書嗰陣右眼白已經有粒嘢，之前醫生話因為越嚟越接近瞳孔，如果唔做手術嘅話好可能會影響視力，所以最後都決定去做手術，重縫咗兩針，呢排都唔可以化妝啦。」
採訪：EddieWong
攝影：HoKwokHo