港股在8900水平整固兩日，唔落得，終於破位而上，恒指升破9000大關，更高收9084，大升183點，成交102億元。破位後短期仍可看好，初步目標係3月高位9282。
大市升勢主力在藍籌，佔恒指比重近6成的4大藍籌，都有可觀升幅，滙豐（005）高收89.25元，大升2.25元。早輪有大行發行類似ELN嘅期權，主角係滙豐，當時股價82.75元，以「Lock死」一年為期，每月收1200股，作價76.0元，逐個月計，投資者要先畀晒1年錢（約110萬元），但有一附帶條件，就係滙豐股價一見到89元，無論造咗幾多個月，之後嘅交易就取消。個「Deal」啱啱先開始，大行亦收晒錢，原本呢個月底交第1期股票，但滙豐話咁快就上到89元，結果如何？當然係退番錢，投資者未嘗甜頭，連息都蝕埋。
在私有化浪潮下，好多平日好冷門嘅股票，突然會有異動，唔係股價大升，就係成交大增。就以榮山國際（570）為例，上個月15日突然由0.24元急升上0.35元（收0.305元），翌日成交更大增1倍至217萬股。過去3個禮拜，榮山在高位整固，本周三重上0.35元後，噚日成交又大增，平收0.33元。0.35元係短期阻力，若升破，照度上去，上升目標係0.5元。
榮山獨沽一味，做發電廠，擁有沙口電廠80%權益，同廣電佛山分公司簽訂供電協議，以目前廣東省經濟發展咁迅速，而佛山市更有機會繼廣州同深圳之後，成為廣東省第3大城市，榮山業績有穩定保證，02年度（12月年結），集團營業額7.32億元，減7.2%，獲利4958萬元，升285%，每股盈利5.98仙，末期息1.8仙。
中國電力工業正進行長期改革，包括重組國有資產及實施新價格機制，小型發電廠日後併合的可能性不容抹煞。榮山資產淨值14.9億元，每股淨值1.79元，現時股價大幅折讓81.5%。
以往績計，榮山PE5.5倍，息率5.4厘。以一隻有穩定收益而又有併合憧憬的股票而言，小注投機可望食到大茶飯。睇番周線圖，榮山成個大型雙底，衝破0.42元，最少可見0.64元。
郭兆誠