成功戰勝癌魔嘅工聯會立法會議員陳婉嫻一直在家休養，八方噚日喺立法會門口見到嫻姐，雖然佢清減唔少，但精神就相當好，嫻姐話原來佢𠵱家有練氣功，多做運動，身體比當初做完手術已經好咗好多。
不過咁唔代表嫻姐冇關心香港政事。佢噚日就批評特首喺抗炎初期政策緩慢，後來叫好番少少，佢又唔明為乜阿董係要將抗炎善後工作拆開做，佢覺得其實畀煲呔一個搞得掂衞生同經濟兩瓣，唔使咁樣分來分去，但嫻姐始終了解阿董，佢話阿董樣樣嘢都鍾意平衡，分開搞就最好！
咁嫻姐幾時復出呢？佢話𠵱家再開成十個八個鐘會怕且未必得，但一、兩個鐘就冇乜問題，所以呢排佢已經開始有去工聯會開吓會，睇吓勞工問題，下周四就會復出，出席特首答問大會，嫻姐話佢最想問有關特首建議成立疾病控制及預防中心細節，同埋中港之間如何加強溝通對抗疫症。但嫻姐話短期內佢就未必可以出席立法會大會，八方都覺得開會長開長有，身體先至最緊要，嫻姐都係要多休息，養好身體要緊。
傳真︰2623-9278
電郵︰